أحمد فهمي: "عاندت" في اختيار ممثل ونجح.. و"عصفور" أقرب أدواري لقلبي

في مقابلة تلفزيونية عبر برنامج "لانا والنجوم"، تحدّث الفنان المصري أحمد فهمي بصراحة وجرأة عن بعض المحطات الفوضوية والمواقف الغريبة في حياته، معترفًا بأنه لا يعيش على وتيرة التنظيم، ولا يهتم كثيرًا بالتفاصيل.

وقال فهمي: "أنا فوضوي جدًا، مش منظم، وبضيع حاجاتي طول الوقت.. النهارده الصبح ضيّعت شنطتي، وقبل كده ضيعت جواز سفري في الرياض"، مؤكدًا أنه لا يتوقف كثيرًا عند التفاصيل، بل يترك الأمور تسير بعفويتها.

وفي حديثه عن اختياراته المهنية، كشف عن قرار اتخذه بدافع العناد، وقال: "كنا بنعمل كاست لفيلم، واقترحت ممثل ما كنتش أعرفه شخصيًا، ولا كنت بحبه أو ما بحبوش، لكن حسيت إنه مناسب، والمنتج قالّي لأ. عاندت وقلتله لأ، أنا هجيبه.. وفعلاً طلع أحلى حاجة في الفيلم، ومن ساعتها بقينا إخوات. وما ندمتش".

وعن أقرب أدواره إلى قلبه، اختار شخصية "عصفور" من مسلسل الرجل العناب، قائلًا: "ده الدور اللي ريّحني فعلًا، لأنه كاركتر طاير كده.. مفيش عنده حسابات، ولا ضمير، ولا دم، وأنا كنت بضحك وأنا بصوّره.. استمتعت بيه جدًا".

وحول تأثير الشهرة، عبّر فهمي عن انزعاجه من تضخيم الأمور الشخصية، قائلاً: "الشهرة بتخلّي كل حاجة أكبر. سواء زواج أو طلاق أو حتى مشكلة بسيطة، بتتحوّل لموضوع كبير جدًا"، وأضاف: "أنا بحب الشغلانة دي عشان التمثيل نفسه.. بحب أعيش الكاركتر، وأكتر حاجة ما بحبهاش هي العروض الخاصة".

كما أشار إلى تعامله مع الشائعات، موضحًا: "كل يوم بيطلع علي إشاعة جديدة، بس أنا ما بقيتش بهتم. زمان كنت بتضايق، دلوقتي بقيت باخدها عادي".